Stina e verës, aq e pëlqyer, shoqërohet shpesh me temperatura të larta, zagushi e lodhje fizike. Temperatura e trupit tonë rritet si nga faktorë të jashtëm (kur është nxehtë), dhe nga vetë metabolizmi ynë.
Megjithatë trupi ka mekanizma vetërregullues të temperaturës (termorregullimi) së brendshme, duke e ruajtur atë në vlera të qendrueshmë 36-37oC, në mënyrë që të gjithë mekanizmat fiziologjikë thelbësorë për jetën të kryhen në mënyrën e duhur.
Ruajtja e temperaturës së brendshme kryhet përmës zgjerimit të enëve të gjakut apo djersitjes, duke eliminuar nxehtësinë e tepërt. Zgjerimi i enëve të gjakut sjell rënie të presionit të gjakut, duke na bërë të ndihemi më të lodhur e të kemi dhe fryerje të këmbëve.
Nga ana tjetër dhe djersitja shërben për të ulur temperaturën. Djersa përbëhet nga ujë (99%), kripëra minerale dhe lëndë të tjera organike. Nëse nuk zëvendësohet sasia e ujit që humbasim përmes djersitjes, atëherë mund të kalojmë në dehidrim, i cili sjell lodhje muskulore, vështirësi në përqendrim, rënie të presionit të gjakut.
Kur bën shumë nxehtë dhe ka shumë lagështirë në ajër, mekanizmat e mësipërm mund të mos jenë të mjaftueshëm për të mbajtur konstante temperaturën e trupit.
Çfarë të bëjmë?
Qëndroni të freskët:
Vishni rroba të gjera, me ngjyrë të hapur, prej pambuku.
Qëndroni në ambiente me ajër të kondicionuar sa më shumë të jetë e mundur. Nëse nuk keni mundësi, bëni dush me ujë të vakët sa më shpesh.
Kufizoni, kur është e mundur, daljet në oraret kur bën shumë nxehtë gjatë ditës.
Përdorni krem dielli, pasi dhe djegiet nga dielli kufizojnë aftësinë e trupit për të përballuar temperaturat e larta.
Shmangni konsumin e ushqimeve të rënda e të nxehta.
Hidratohuni
Konsumoni ujë dhe atëherë kur nuk keni etje.
Shmangni konsumin e pijeve me sheqer apo pijeve alkolike, pasi ato mund të sjellin humbje të mëtejshme të lëngjeve nga trupi.
Zëvendësoni kripërat minerale që humbisni përmës djersitjes duke konsumuar pije të freskëta e duke ngrënë ushqime me përmbajtje të lartë uji.
Informohuni
Qëndroni të informuar mbi parashikimin e motit, në mënyrë që të merrni masa paraprake parandaluese.
Tregoni kujdes të veçantë për individët më të rrezikuar si:
– fëmijët deri në 4 vjeç,
– të rriturit ≥ 65 vjeç,
– Individët që janë mbipeshë
– të sëmurët kronikë