Komisioni Hetimor për hetimin e krimeve zgjedhore për zgjedhjet parlamentare të 25 prillit do të thërrasë për të dëshmuar 24 funksionarë publikë. Ata do të japin sqarime në lidhje me disa pika të përcaktuara nga komisioni i drejtuar nga demokratët.
Lista ka emra nga kryeministri Edi Rama, zv/kryeministrit Arben Ahmetaj, ministri i Brendshëm Bledi Çuçi, kreu i SPAK Arben Kraja, drejtuesin dhe ish-drejtuesin e policisë së Shtetit Gledis Nano dhe Ardi Veliu e deri te dy gazetarët Armand Shkullaku dhe Andi Bushati.
Kryetari i këtij komisioni Enkelejd Alibeaj deklaroi në mbledhjen e sotme se hetimi do të sqarojë mënyrën e zbatimit të ligjit, përdorimin e funksioneve publike në funksion të zgjedhjeve, kuadrin ligjor për mbrojtjen e të dhënave personale si dhe hetimin e veprimeve dhe mosveprimeve të organeve publike.
“Hetimi do të sqarojë mënyrën e zbatimit të ligjit, përdorimin e funksioneve publike në funksion të zgjedhjeve. Hetimi do të hetojë kuadrin ligjor për mbrojtjen e të dhënave personale, cila janë subjektet që janë detyrimin për mbrojtjen e të dhënave personale. Cilat janë arsyet që i kanë shtyrë autorët për kryerjen e këtyre shkeljeve. Cili është kuadri ligjor sa i takon shpërblimeve për dëmet e shkaktuara nga tërmeti i vitit 2019.
Cilat janë subjektet që i kanë shkelur detyrimet ligjore dhe cilat janë arsyet që i kanë shtyrë për kryerjen e këtyre shkeljeve, Cili është kuadri ligjor që rregullon dhënien e lejeve të legalizimit gjatë procesit zgjedhor. Cilët janë subjektet e ngarkuar nga ligji për dhënien e lejeve. Cilat janë arsyet që i kanë shtyrë subjektet e mësipërme për kryerjen e këtyre shkeljeve. Cili është kuadri ligjor që rregullon punësimet në administratën publike.
Detyrat e komisionit janë kontrolli i veprimeve dhe mosveprimeve për mbledhjen e informacionit. Kontrolli i veprimeve të organeve publikeve sa i takon dhënies së shpërblimeve, kompensimeve, dhënien e ndihmës ekonomike.
Do të hetohet numri i procedimeve penale për krimet zgjedhore dhe fazën e hetimit të tyre. Komisioni hetimor do të përdorë të gjitha metodat e hetimit, përfshirë këqyrjen, kontrollin apo sekuestrimin e akteve pranë institucioneve përgjegjëse. Në përputhje me nevojat gjatë hetimit do caktohet ekspertë”, tha Alibeaj.
Lista e personave që do të thirren për të dëshmuar
- Edi Rama- Kryeministër
- Arben Ahmetaj – Zv/kryeministër dhe ministër për Rindërtimin
- Bledi Çuçi- Ministër i Brendshëm
- Belinda Balluku – Ministre Infrastrukture
- Ogerta Manastirliu- Ministrja e Shëndetësisë
- Emirjana Sako- Kryetarë e Bashkisë së Durrësit
- Erion Veliaj- Kryetar i Bashkisë së Tiranës
- Arben Kraja- Kreu i SPAK
- Olsian Çela- Kreu i Prokurorisë së Përgjithshme
- Ardi Veliu- Ish-drejtor i Policisë së Shtetit
- Gledis Nano- Drejtor i Policisë së Shtetit
- Artan Lame – Kreu i Kadastrës
- Lindita Karçanaj – Kreu i AKSHI-t
- Shkëlqim Hajdari- Inspektor i Përgjithshëm i Inspektoratit
- Rejda Kashta – Drejtoreshë e Agjencisë së Prokurorimeve Publike
- Sokol Zaimi – Drejtor i Rezervave Materiale të Shtetit
- Bledar Doracaj- Drejtor i Gjendjes Civile
- Albana Koçiu – Drejtoreshë e Departamentit të Administratës Publike
- Adrian Çela – Administrator i OSHEE
- Laert Duraj – Ish-drejtor i Postës Shqiptare
- Besnik Dervishi – Komisioner për Mbrojtjen e të Dhënave Personale
- Erinda Ballanca – Avokati i Popullit
- Armand Shkullaku – Gazetar
- Andi Bushati – Gazetar
