Që nga e shtuna dhe deri në 22.45 të së dielës kishin ndodhur një seri lëkundjes dhe pas atij 5.8 ballë edhe të paktën 20 të tjera. Tërmeti kryesor i Follorinës u ndje në gjashtë shtete të Ballkanit dhe gjerësisht në Shqipëri.
Ajo që ra në sy në këto tërmete ishte se ato ndodhën në një zonë që nuk ka pasur aktivitet sizmik.
Gjithashtu u evidentua se intensiteti makrosizmik arriti deri në kategorinë e gjashtë.
Që prej orës 22.45 të së dielës, shumë banorë të Follorinës dolën jashtë nga pasiguria që ndjenin.
Eftimi Leka, Presidenti i OASP-së, (Organizata për Planifikimin dhe Mbrojtjen nga Tërmeti), tha për mediat greke se “forca e tërmetit ishte shumë e madhe ndaj dhe u ndje edhe përtej kufijve tanë”.
Kurse theksoi se pikëpyetja që ngrihet është nëse ka qenë tërmeti kryesor dhe shtoi:
“Pikëpamja ime personale është se ishte tërmeti kryesor ai në 22.45, por ne duhet të monitorojmë evolucionin e fenomenit. Ne nuk kemi ndonjë histori sizmike të kohëve të fundit për të parë se si sillet zona”.
Leka tha se afro 101 vjet më parë ka pasur tërmet në atë zonë: “Në vitin 1920 ka ndodhur për herë të fundit një tërmet, disa tërmete të vogla në zonë”.
Duke u ndalur te “vallja” e tërmeteve të së dielës, Leka tha se e kishin konstatuar një ditë më parë këtë situatë që po precipitonte:
“Këtë thyerje e kemi detektuar mbrëmë. Pjesa jugperëndimore e kësaj thyerjeje kalon nga qyteti i Follorinës, prandaj edhe ndihen këto, sepse janë tërmete të cekëta. Aktiviteti sizmik është në zhvillim e sipër, kemi 13 tërmete mbi 3 gradë. Është mbledhur trupi koordinues, jemi në kontakt me Sekretariatin e Përgjithshëm për Mbrojtjen Civile”, njoftoi Leka.
Shërbimi sizmik grek, në faqen zyrtare evidenton disa dhjetëra tërmete para dhe pas atij të orës 22.45 (23.45 ora lokale).
Leka bëri të ditur se ka pasur dëme nga këto lëkundje sizmike: “Të dhënat e para janë për disa dëmtime të objekteve të vjetra”.
Ndërsa dha edhe një këshillë që citon noa.al: “Në qytet dhe në fshatrat përreth ka ndërtesa të vjetra, ndaj duhet të kemi kujdes që të mos banojmë në to, të mos kalojmë nëpër to”.
Sakaq shkollat në Follorinë, Prespe dhe Amynteo do të qëndrojnë të mbyllura ditën e sotme, për arsye parandaluese pas tërmetit 5.5 ballë me epiqendrën në Follorinë dhe pas breshërisë së goditjeve që pasuan.
Sipas vendimit të autoriteteve, kopshtet dhe shkollat fillore dhe të mesme do të qëndrojnë të mbyllura ditën e hënë më 10 janar 2022 për arsye parandalimi dhe sigurie, për shkak të lëkundjeve sizmike.
