Ish-kryetari i Bashkisë Himarë, Vasil Bollano, u shoqërua me efektivë policie nga spitali i Vlorës deri në Gjykatë, ku u njoh me masën e sigurisë “arrest shtëpie”, pas aksidentit të dy ditëve më parë, ku përplasi një 17-vjeçar i cili ndërroi jetë më vonë në spital. Masa u dha e tillë për shkak të gjendjes shëndetësore të Bollanos.

Ai ka qenë i shtruar në spital pas aksidentit, pasi vuan nga leucemia dhe diabeti dhe është çuar atje me hipertension të lartë dhe vlera të larta të diabetit.Aksidenti ndodhi mbrëmjen e së mërkurës pranë fushës së sportit në Qafën e Llogorasë, teksa 17-vjeçari ishte duke kaluar në rrugë.

Adoleshenti ndërroi jetë në Spitalin e Traumës në Tiranë, ku u transportua pas aksidentit, pasi nuk i mbijetoi plagëve të marra nga përplasja. Ai përfundoi në koma gjatë kohës që ishte shtruar në spitalin e Himarës dhe më pas u transportua drejt spitalit të Traumës në Tiranë, ku edhe ndërroi jetë në orën 02:00 pas mesnatës.