Një tjetër tragjedi me emigrantët që udhëtojnë me varka drejt vendeve të BE-së është regjistruar mëngjesin e së enjtes, këtë herë pranë brigjeve të Spanjës.
Sipas të dhënave paraprake, mësohet se të paktën 4 emigrantë të paligjshëm humbën jetën, pasi skafistët që po i transportonin i hodhën në mes të detit, pranë Kadizit.
Mediat iberike shkruajnë se një motoskaf i shpejtë mbërriti pranë brigjeve spanjolle dhe nga frika se mos pikasej nga policia, drejtuesi i tij i detyroi emigrantët, rreth 30 syresh, që të hidheshin në det.
Kjo rezultoi fatale për disa prej tyre që nuk mundën të dilnin në breg, teksa nacionaliteti i tyre ende nuk bëhet me dije.
