E ndërsa piloti 32-vjeçar Babis Anagnostopulos pranoi vrasjen e gruas së tij Caroline, për hetuesit misteri nuk është zbuluar plotësisht pasi disa pyetje janë ende pa përgjigje.
Në dosjen e autoriteteve janë të gjitha lëvizjet e fundit të Caroline, e cila natën fatale po kërkonte një hotel në internet për të qëndruar me vajzën e saj, pasi kishte vendosur që të largohej nga bashkëshorti si pasojë e konflikteve të vazhdueshme.
Mediat greke shkruajnë se hetuesit po shqyrtojnë një foto të gjetur në telefonin e saj celular, e cila është marrë në orën 12 të natës pa u sqaruar arsyet, dhe që tregon Babis Anagnostopulos ulur në divan duke mbajtur Lydia-n e vogël në krahë.
Fotoja është marrë nga aplikacioni që ajo kishte në celularin e saj i cili është i lidhur me kamerat e shtëpisë dhe ishte fiksuar në kohën kur Caroline ishte në dhomën e gjumit në papafingo pas debatit me burrin e saj.
Arsyeja e fotos ende nuk dihet, duke krijuar një tjetër pikëpyetje te hetuesit. Sot policia deklaroi se Babis Anagnostopulos nuk është ndihmuar nga asnjë person tjetër për skemën e organizuar prej tij pas vrasjes së gruas 20-vjeçare.
