Në një moment historik për sportet motorike, pilotja saudite Rem Al Abud regjistroi kohën më të shpejt në start, për të arritur nga 0 deri në 100 kilometra në orë.
Me makinën elektrike të garave GENBETA, e nisur nga vendi ajo arriti shpejtësinë 100 kilometra në orë, në vetëm 2,49 sekonda.
Kronometri u ndal edhe më shpejt se koha standarde e përcaktuar për makinat e Formula Një, duke kaluar parametrin e referimit të vendosur nga Federata Ndërkombëtare e Automobilizmit për njëvendëshet e garave.
Ky rekord konfirmoi zhvillimin e jashtëzakonshëm të programit GENBETA në Formula E, që bazohet në makinat e garave të gjeneratës së tretë dhe të përmirësuar nga partnerët e kampionatit. Përveç thyerjes së primateve të shpejtësisë, Formula E konfirmoi edhe objektivin e përfshirjes së sa më tepër piloteve femra në gara.
