Autoritetet greke kanë publikuar detaje të reja nga operacioni që çoi në arrestimin e ish-deputetit grek të Agimit të Artë, Christos Pappas, një armik i betuar i shqiptarëve i cili u prangos më 1 korrik pasi ishte fshehur Athinë në shtëpinë e një gruaje 52-vjeçare nga Ukraina.
Ishte një telefonatë anonime në rajonin e policisë që vendosi në dijeni autoritetet për fshehjen e tij në një godinë në një lagje pranë qendrës së Athinës, që vendosi në lëvizje agjentët për të kontrolluar dhe survejuar të gjitha lëvizjet në zonë që çuan në prangosjen e Pappas.
Ndërkohë që avokati i ish-deputetit hodhi poshtë planin e arratisjes së Pappas jashtë vendit. “Christos Pappas nuk kishte në plan të shkonte jashtë vendit dhe ajo që unë di dhe besoj është se ai donte të shmangte dënimin e gjatë” tha ai.
Por mediat greke bazuar te informacionet nga autoritetet flasin për një plan arratisje të Pappas për në Itali, me anije, ose nga Patra ose Igumenica.
Skenarët për arratisjen e tij jashtë ishin dy: ose me letra false, ose duke u fshehur në një kamion me mallra, shoferi i së cilit do të ishte në “rrjetin” e mbështetësve të Christos Pappas. Por zbulimi nga agjentët bllokoi planet.
Ai është dënuar me 13 vite burg për drejtim organizate kriminale.
