Sa në mënyrë të barabartë ndahen punët e shtëpisë mes anëtarëve të familjes? Çfarë barre i bie nënës dhe çfarë babait? Kjo është sigurisht një pyetje, por edhe një shqetësim, të cilin qeveria spanjolle dëshiron ta nxjerrë në pah. Për ta bërë këtë, ata po krijojnë një aplikacion falas që do të regjistrojë sa kohë shpenzon çdo anëtar i familjes për punët e shtëpisë.
Nënsekretarja e Spanjës për Barazinë, Ángela Rodríguez, tha se qëllimi ishte të hidhte dritë mbi “barrën e padukshme mendore” të mbartur në masë dërrmuese nga gratë kur bëhet fjalë për punën në shtëpi.
“Së shpejti do të paraqesim një aplikacion që do të lejojë regjistrimin e punëve të shtëpisë të kryera nga anëtarë të ndryshëm të familjes, në mënyrë që të shohim se sa orë punon secili prej nesh dhe kështu të riorganizojmë kohën që i kushtojmë punëve të shtëpisë”, tha ajo.
Aplikacioni i ri që do i kushtojë qeverisë si fillim 211,750 euro, është krijuar për të siguruar që çdo anëtar i familjes të bëjë pjesën e tij.
“Ne mendojmë se ky është një “ushtrim” që mund të përdoret në shtëpi për të ndarë punët e punës midis të gjithë anëtarëve të familjes (fëmijëve, bashkëshortëve) ose midis shokëve të dhomës ose partnerëve, sepse shpërndarja e këtyre detyrave është shpesh e pabarabartë”, shtoi Rodríguez.
Aplikacioni do të shërbejë gjithashtu për të nxjerrë në pah të gjitha “detyrat e padukshme” të nevojshme për funksionimin normal të një shtëpie.
“Edhe pse rregullimi i kuzhinës mund të zgjasë vetëm 20 minuta,” tha Rodríguez, “kjo varet nëse dikush u kujtua të blinte detergjentin për larjen e enëve ose nëse e ka planifikuar listën e ushqimeve”.
Aplikacioni është pjesë e planit të përgjegjësive të përbashkëta të Ministrisë së Barazisë, një seri politikash publike që synojnë përmirësimin e barazisë midis burrave dhe grave.
Një sondazh i kryer vitin e kaluar nga Instituti Kombëtar i Statistikave të Spanjës zbuloi se 45.9% e grave bënin shumicën e punëve të shtëpisë, krahasuar me vetëm 14.7% të burrave.
Ministria tha: “Sfida qëndron në hartimin e sistemeve të integruara të kujdesit nga perspektiva gjinore, ndërsektoriale dhe e të drejtave të njeriut që promovojnë përgjegjësinë e përbashkët midis burrave dhe grave”.
