Fejesa luksoze e një milioneri italian rezultoi që të ishte thjesht një kurth i mirëpërgatitur për partneren e tij, të cilën e akuzoi publikisht për tradhti.
Sipas Daily Mail, të ftuarit janë tronditur nga ajo që ndodhi në pallatin e 64-vjeçarit Massimo Segre në Torino. Ato kishin ardhur për të festuar fejesën e bankierit me 47-vjeçaren Christina Seimandi, por në fund dëshmuan ndarjen e tyre publikisht. Në fjalimin e tij, milioneri zbuloi se partnerja e tij e tradhtonte, madje i tha që të shkonte në Mykonos me të dashurin e saj, pasi ai ia ka paguar të gjitha.
“Dua t’i jap Christina-s lirinë për të dashuruar. Më konkretisht, të duash një person tjetër, një avokat të dalluar për të cilin padyshim që kujdeset më shumë se sa unë. E dashura ime Christina, e di sa e dashuruar je me të shpirtërisht dhe seksualisht. Mos mendo se më vjen mirë të dukem si një qyqe para të gjithëve… Është një histori banale e tradhtisë para se të bëhet dasma. Jam shumë i zhgënjyer dhe i trishtuar”, tha ai.
Menjëherë pasi Segre mbaroi fjalimin e tij, dritat u zbehën dhe ai u largua. Sipas mediave, shumë nga të ftuarit e festës u mërzitën nga mënyra se si miku i tyre milioner zgjodhi të trajtonte ndarjen e tij, duke i përdorur si shikues.
