Sot pritet të mbërrijnë 300 afganët e parë në Shqipëri. Në kuadër të marrëveshjes me SHBA, në Shqipëri do të strehohen rreth 2 mijë afganë, të cilët janë bashkëpunëtorë të ushtrive të NATOS dhe që po largohen prej andej bashkë me familjet e tyre.
Një pjesë e madhe e afganëve do të qëndrojnë përkohësisht në godinat e Qytetit Studenti, ose në konviktet e tjera në Tiranë, ndërsa një pjesë tjetër pritet të akomodohen në hotelet e Durrësit.
Qytetarët afganë që do të strehohen në vendin tonë kanë punuar gjatë këtyre viteve me SHBA-në dhe NATO, si dhe aktivistë dhe mendohet se do të jenë shënjestra e hakmarrjes talebane, pasi këta të fundit morën pushtetin, prandaj largimi i tyre është parë si emergjent.
