Nga Fieri ku ishte sot, kryeministri Edi Rama ironizoi takimet elektorale të kryedemokratit Lulzim Basha.
Rama prezantoi sot kandidatët për deputetë në qarkun e Fierit.
Kryeministri shtoi se ndryshe nga rregullorja anti-Covid, ka mbledhur shumë njerëz.
Rama i bëri thirrje Bashës që të heqë dorë nga dëshira për të mbledhur njerëz, pa marrë parasysh rrezikun. – “Virusi nuk njeh të majtë e të djathtë, por godet nga të katër anët”, tha Rama.
Kryeministri tha se nga partitë mund t’i bëhet një kërkesë Komitetit Teknik të Ekspertëve që të rritet numri i grumbullimeve, para se të shkelet rregullorja. “Ne mund të shkojmë në zgjedhje me vetëm 10 vetë në çdo takim”, tha Rama duke shtuar se si ndryshim, “PD mbledh shumë njerëz për fitore imagjinare”.
“Ngjitur e ngjitur me njëri tjetrin për të përshëndetur karvanin e fitores imagjinare e atyre që pasi e humbën çdo shans të shkuarën, kërkojnë një shans të ri që nuk kanë për të marrë. Shqiptarët nuk duan më të eksperimentojnë rikthimin e PD në pushtet dhe të çfarë PD-je. Që sot është e përfaqësuar nga skuadra më e keqe, më e dobët, më absurde e 30 viteve”, u shpreh Rama.
Kryeparlamentari prezantoi emrat e kandidatëve ku konfirmoi se dy prej tyre mungonin, përfshirë edhe ish-kryeministrin Bashkim Fino, i cili është aktualisht i infektuar me Covid.
Drejtuesi politik i PS në Fier, Gramoz Ruçi, ka zbuluar se veç Bashkim Finos edhe një tjetër kandidat i socialistëve për deputet është infektuar me Covid. Bëhet fjalë për Nimet Musaj, aktualisht deputet në Kuvend nga opozita e re. Ruçi iu uroi shërim të shpejtë të dy kandidatëve, ndërsa prezantoi një e nga një të gjithë kandidatët e tjerë.
Listën e PS-së në qarkun e Fierit e kryeson zv.Kryeministri, Erion Braçe.
