Mbretëria e Bashkuar ka vaksinuar 60% të popullsisë së rritur, ku 3 në 5 qytetarë kanë marrë dozën e parë të vaksinës kundër koronavirusit.
“Tre në pesë njerëz të rritur janë vaksinuar”, tha të martën sekretari britanik i Shëndetësisë, Matt Hancock.
Sipas tij, 31,622,367 njerëz në total kanë marrë një dozë të vaksinës, ndërsa 5,496,716 janë vaksinuar me dy doza.
Shifra e fundit tregon se 10.4 për qind e popullsisë së rritur britanike është vaksinuar plotësisht, ndërsa 60% vetëm me një dozë.
Hancock e ka cilësuar këtë si një lajm “fantastik”.
Në një postim në Twitter, ai i falënderoi “të gjithë të përfshirët në shpërndarjen e vaksinave”.
“Ne po bëjmë përparime të mëdha në përpjekjen tonë kombëtare”, tha ai.
Mbretëria e Bashkuar ka qenë vendi i parë në botë që ka nisur vaksinimin kundër koronavirusit në dhjetor të vitit të kaluar, me vaksinën Pfizer/BioNTech.
Vaksina tjetër që përdor ky vend është AstraZeneca, ndërsa Moderna është miratuar.
Të tria vaksinat duhet të jepen në dy doza për të qenë sa më efektive.
Mbretëria e Bashkuar është një nga vendet më të prekura në Evropë nga koronavirusi.
Ajo ka regjistruar numrin më të madh të viktimave në kontinent: mbi 127,000.
Në total, mbi 4.3 milionë njerëz janë infektuar me koronavirus atje.
