arianti i COVID-19 që besohet se qëndron pas një rritjeje tronditëse të infeksioneve dhe vdekjeve në Indi është zbuluar në 17 vende të botës, duke përfshirë vende të shumta evropiane.
Sipas të dhënave nga Qendra Evropiane për Parandalimin dhe Kontrollin e Sëmundjeve (ECDC), varianti B.1.617, i njohur gjithashtu si varianti indian sepse u zbulua për herë të parë në vendin e Azisë Juglindore – tani është gjetur në shtatë vende të Evropës.
Këto janë Belgjika, Gjermania, Irlanda, Holanda, Zvicra, ishulli francez i Karaibeve Guadelupa dhe Mbretëria e Bashkuar.
Mbretëria e Bashkuar kishte zbuluar 132 raste deri më 21 prill – më shumë se çdo vend evropian. Vendet e tjera evropiane deri më tani kanë vërejtur më pak se 10 raste secila.
Në azhurnimin e saj të fundit të përjavshëm të lëshuar të martën, Organizata Botërore e Shëndetësisë shënoi se “të paktën 17 vende” kanë parë infeksione me variantin indian dhe se shumica e mostrave “vijnë nga India, Mbretëria e Bashkuar, Shtetet e Bashkuara dhe Singapori”.
Varianti B.1.617 ka nën-linja të shumta të cilat ndryshojnë pak nga mutacionet e tyre karakteristike, por një nga ato kryesore, i quajtur L452R, është shoqëruar me transmetueshmëri të rritur dhe rezistencë më të ulët ndaj trajtimit, përfshirë vaksinimin, vuri në dukje OBSH.
India ka kaluar numrin prej 200.000 të vdekjeve nga COVID-19 të mërkurën me më shumë se 3,000 vdekje të raportuara gjatë 24 orëve të mëparshme – një rekord ditor për vendin.
Numri i viktimave është rritur javët e fundit me rreth 44,000 vdekje të regjistruara që nga 1 marsi.
Gjithashtu aty janë zbuluar më shumë se 300,000 infeksione të reja për të shtatën ditë radhazi.
Situata dramatike është bërë edhe më serioze nga mungesa e furnizimeve mjekësore. Disa vende njoftuan se po përgatisin dërgesa emergjente.
Në përpjekje për të frenuar depërtimin e këtij varianti indian, Mbretëria e Bashkuar, Franca, Gjermania dhe Belgjika kanë mbyllur kufijtë për udhëtarët nga India, duke lejuar që vetëm qytetarët dhe banorët e tyre të hyjnë me kërkesa të rrepta karantine pas mbërritjes.
