Shtetet e Bashkuara të Amerikës rrisin presionin kundër Lulzim Bashës për t’u distancuar nga Sali Berisha, pasi ish-kryeministri u shpall “non grata”.
Vetëm pak javë pas zv/ ndihmës sekretarit amerikan për Çështjet Evropiane dhe Euroaziatike Philip Reeker, sot ishte ambasadorja Yuri Kim që i kërkoi qartë dhe prerë kryedemokratit që të largojë nga grupi i PD-së, Sali Berishën.
“Do të ishte një ironi historike por edhe një tragjedi për këtë vend, jo vetëm për partinë, nëse partia do të “hante bar” për hir të interesave personale të një njeriu” tha Kim, referuar hapur Berishës.
Gazetari i “ABC” Juxhin Mustafaraj mëson se takimi i Yuri Kim me Lulzim Bashën nuk ka qenë i planifikuar, por i kërkuar nga vetë shefja e diplomacisë amerikane në Tiranë për të diskutuar lidhur me këtë kërkesë. Takimi zgjati për një orë e 15 minuta dhe në fund, Kim foli me qëndrimin e fortë.
Por cila ishte përgjigja e Lulzim Bashës?
E ndërsa nuk dihet qëndrimi që ka mbajtur përpara Kim, Lulzim Basha publikisht këtë çështje në herën e fundit që kishte bashkëbisedim me gazetarët për cështjen e raportit të OSBE-së e shmangu.
Deputeti Mark Marku disa ditë më parë në “ABC” kërkoi që PD të vendoste një “ngrirje” të marrëdhënieve me Sali Berishën, pasi dëmton opozitën, ndërkohë që vetë ish-kryeministri nuk e ka ndërmend një gjë të tillë, madje është shprehur se pret me padurim legjislaturën e re të Kuvendit në shtator.
Deklarata e plotë e Yuri Kim sot pas takimit me Lulzim Bashën
Pata një diskutim shumë të mirë dhe të plotë me Kryetarin e PD Lulzim Basha sot. Ishte në vijim të takimit që ai pati kur Zv. Ndihmës Sekretari i Shtetit Phil Reeker ishte në Tiranë.
Folëm për forcën e marrëdhënieve Shqipëri-SHBA, rolin shumë të rëndësishëm që Partia Demokratike ka luajtur në vendosjen e marrëdhënieve SHBA-Shqipëri si dhe rëndësinë që ka që Shqipëria të qëndrojë në rrugën e saj drejt Europës.
Nuk ka dyshim për rolin historik që Partia Demokratike ka luajtur, është i pazëvendësueshëm dhe i domosdoshëm dhe, në këtë kuptim është lajm shumë i mirë që PD do të rikthehet në parlament në shtator.
Kuptoj që PD dhe të tjerë kanë shqetësime në lidhje me zgjedhjet e 25 prillit dhe të gjithë e dimë që ato shqetësime janë pasqyruar në raportin përfundimtar të nxjerrë nga ODIHR.
Do të jetë jashtëzakonisht e rëndësishme dhe e nevojshme që institucionet përkatëse t’i trajtojnë ato shqetësime në mënyrë kuptimplotë dhe Shtetet e Bashkuara do të vazhdojnë të mbështesin këto përpjekje për të përmirësuar në mënyrë konstante zgjedhjet dhe demokracinë në Shqipëri.
Teksa PD kthehet në parlament, do të jetë shumë e rëndësishme që partia në pushtet, PS, të tregojë se është serioze për t’u ngritur mbi interesat partiake për hir të vendit.
Do të doja të theksoja gjithashtu përgjegjësinë që kanë kryetarët e partive për t’u siguruar që kur të hyjnë në atë parlament, të shoqërohen nga anëtarë që janë të denjë për të përfaqësuar Shqipërinë. Do të jetë veçanërisht e rëndësishme që edhe PD t’i mendojë këto çështje. Siç e përmenda më parë, Partia Demokratike ka luajtur një rol të pazëvendësueshëm, për ta nxjerrë këtë vend nga komunizmi, për ta çliruar nga diktatura.
Do të ishte një ironi historike por edhe një tragjedi për vendin, jo vetëm për partinë, nëse partia do të hante bar për hir të interesave personale të një njeriu. Shpresa jonë është që partitë do të ecin përpara, që ky vend do të ecë përpara, që bashkëpunimi midis Shteteve të Bashkuara dhe Shqipërisë të ecë përpara.
E ardhmja po pret. Ka vendime të vështira përpara për të gjithë. Shpresoj që të gjithë të mund të pushojnë mirë gjatë gushtit, por shpresoj edhe që kur të kthehen të freskët dhe të ripërtërirë në vendosmërinë e tyre për të zgjedhur të ardhmen kundrejt të kaluarës. Faleminderit shumë.
