Në fund të gushtit 2021, Talia Shmuel e çoi djalin e saj pesëvjeçar në klinikën e tyre shëndetësore në Jeruzalem, për vaksinën e tij të parë kundër Covid-19. Ai lindi me një defekt në zemër dhe si efekt anësor ka një grykë të ngushtuar rëndë, gjë që e bën atë veçanërisht të prekshëm ndaj sëmundjes. “Sa herë që sëmuret, në përgjithësi kthehet në pneumoni,” thotë Shmuel. “Dhe ai sëmuret shumë.”
Shmuel, nënë e tre fëmijëve, kishte nevojë për autorizim të veçantë nga Ministria e Shëndetësisë e Izraelit për të vaksinuar djalin e saj, për shkak të moshës së tij të re. Ajo u ndje e emocionuar dhe e sigurt se ishte zgjedhja e duhur. “Burri im dhe unë jemi të dy analistë të kërkimit, dhe ne shikojmë çdo numër të vetëm që haset; ne jemi duke ndjekur gjithçka,” thotë ajo. “Ne kontrollojmë burime të ndryshme. Ka efekte anësore të mundshme të vaksinës. Megjithatë, efektet anësore të Covid-19 janë dukshëm më të këqija.”
Ndërsa gjithnjë e më shumë vende në botë po fillojnë të ofrojnë vaksina Covid-19 për fëmijët mbi 12 vjeç, Izraeli ofron një paraqitje të shkurtër të asaj që mund të jetë e ardhmja. Vendi vaksinoi me shpejtësi një pjesë të madhe të popullsisë së tij të rritur në fillim të këtij viti. Në qershor, ai rekomandoi vaksinimin e fëmijëve mbi 12 vjeç, pas shpërthimeve në shkolla dhe tani tashmë po ofron doza të treta si injeksione përforcuese për atë grupmoshë.
“Vaksina funksionon,” thotë Nicole Ritz, specialiste për sëmundjet infektive pediatrike në Spitalin Universitar të Fëmijëve, në Zvicër. “Por njësoj siç kemi bërë për moshat 12 deri në 18 vjeç. Potencialisht, kjo do të jetë një vaksinë të cilën ne e japim në vitin e parë të jetës, siç ne bëjmë edhe me shumë vaksina të tjera. Sa më shumë që ulet mosha, aq më shumë keni nevojë për të dhëna të cilat tregojnë se kjo është një vaksinë e sigurt.
Të pyetur se si ndiheshin për vaksinën te fëmijët më të vegjël, përfshirë ata pa sëmundje shoqëruese, disa prindër treguan entuziazëm. Ata përmendën frikën e tyre për infektimin e fëmijëve të tyre, ankthin për bllokimet fillestare, djegien nga karantinat e shpeshta dhe shkollimin në shtëpi, shqetësimin për rënien e fëmijëve të tyre në shkollë, ose paaftësinë e fëmijëve të tyre për të mësuar nga distanca.
Vaksinimi i fëmijëve mund të ndihmojë në thyerjen e atij cikli rihapjesh të virusit, të ndjekur nga rritje dhe dështimin ndaj Covid-19, thonë disa ekspertë.
“Unë besoj, dhe e kam thënë gjatë gjithë kohës, se ne duhet të vaksinojmë fëmijët në mënyrë që të kontrollojmë pandeminë, që në moshë të hershme,” thotë epidemiologu Manfred Green, profesor në Shkollën e Shëndetit Publik në Universitet e Haifa në Izrael. Shumë herët në pandemi, shpjegon ai, “ne e dinim që kjo ishte një sëmundje shumë e transmetueshme; tani është bërë më e transmetueshme me variantin Delta.” Zyrtarët e shëndetit publik kishin shpresuar se nëse 60% deri 70% e popullsisë kishin imunitet, pandemia mund të kontrollohej, thotë ai. Ata tani e kuptojnë se ajo përqindje duhet të jetë shumë më e lartë. Vaksinimi i fëmijëve do të “pakësonte atë grup” të njerëzve jo imunë në popullatë.
