Silvio Berlusconi, miliarderi me stilin pompoz dhe ish-kryeministri italian që dikur e kishte përshkruar vetën si Jezu Krishti i politikës, u nda nga jeta në moshën 86-vjeçare, në spitalin e San Raffaele në Milano.
Berlusconi, i cili ka pasur një sërë problemesh shëndetësore, ishte diagnostikuar së fundmi me leucemi, dhe gjendja e tij ishte përkeqësuar prej pak ditësh, pas daljes nga spitali në muajin maj. I konsideruar për shumë kohë si figura më shumëngjyrëshe e politikes italiane, ishte 4 herë kryeministër nga viti 1994 deri në 2011, dhe udhëhoqi Italinë për 9 vite, më shumë se kushdo tjetër që prej kohës së diktatorit fashist Benito Musolini.
Personaliteti pompoz, impresiononte elektoratin italian, që vazhdonte ta mbështeste edhe kur karriera e tij dukej drejt fundit, për shkak të akuzave për korrupsion apo evazion fiskal. Në shumë prej çështjeve gjyqësore kundër tij, u shfajësua ose dënimi iu përmbys. 9 vite pasi ju ndalua të kandidonte për post publik, për shkak të akuzave për evazion fiskal, ai u rikthye në parlament, dhe u zgjodh në Senat para se të mbushte 86 vjeç. Partia e tij, Forza Italia, ishte partner koalicioni me qeverinë e Giorgia Meloni. Por titujt kryesorë të mediave rreth globit I pushtoi shpesh jo për jetën politike, por për atë private; për dëshirën për ta rrethuar veten me gra të reja e të burkura dhe skandalet e shumta seksuale. Skandali i profilit më të lartë ishte ai i “bunga bunga”; siç u pagëzuan festat e panumërta në vilën e tij, e ku merrnin pjesë vajza të spektaklit.
I bujshëm ishte rasti i 17-vejçares Karima El Magruh në vitin 2010, e pagëzuar me emrin Rubi vjedhësja e zemrave. Atëherë kryeministri telefonoi një rajon police dhe kërkoi lirimin e egjiptianes, që ishte pjesë e festave të tij.
Berlusconi u shpall fajtor se e kishte paguar atë për seks dhe se kishte abuzuar me pushtetin në 2013, po vendimi u përmbys një vit më vonë. I njohur me pseudonimin kavaleri, biznesmeni dhe themeluesi i një perandorie mediatike në Itali, ishte gjithashtu i famshëm për humorin dhe batutat e tij, e për marrëdhëniet e ngushta me liderët autokratë si, Muamar Gadafi dhe Vladimir Putin.
