Gjykata e Apelit ka lënë në masën e sigurisë “arrest me burg” Milena Derajn, ish-punonjësen e Bankës së Shqipërisë, e arrestuar më 24 maj me dyshimet se kishte përfituar 340 mijë euro nëpërmjet mashtrimit familjes Ferracaku.
Deraj ka dorëzuar një deklaratë noteriale ku pranonte se i njihte borxhin familjes Ferracaku, por pretendon se u detyrohet më pak dhe se nuk ua ka marrë përmes mashtrimit.
Sipas saj, nga shuma 340 mijë euro që u kishte marrë për të shpëtuar të akuzuarit nga dënimi me burg përjetë për masakrën e Velipojës, në fakt u detyrohet 225 mijë euro.
E pandehura shpjegon se i ka detyrim familjes Ferracaku 225 mijë euro dhe jo 340 mijë.
“Referuar interesimit të medias, Gjykata e Apelit të Juridiksionit të Përgjithshëm, informon sa më poshtë:
Prokuroria pranë Gjykatës së Shkallës së Parë e Juridiksionit të Përgjithshëm, ka regjistruar procedimin penal, ndaj shtetases me iniciale M.D, e dyshuar për kryerjen e veprës penale “Mashtrim”, ndaj familjes “Ferracaku” për ngjarjen e ndodhur në Velipojë, në vitin 2021.
Gjykata e Shkallës së parë e Juridiksionit të Përgjithshëm Tiranë, ka zhvilluar gjykimin lidhur me vlerësimin e ligjshëm të ndalimit dhe caktimin e masës së sigurimit “arrest ne burg”, për personin nën hetim shtetasen me iniciale M.D, e dyshuar për kryerjen e veprës penale “Mashtrim”, të parashikuar nga neni 143/3 të Kodit Penal.
Gjykata e shkallës së parë e Juridiksionit të Përgjithshëm Tiranë, me vendimin nr. 1127 Akti, datë 26.05.2023, ka vendosur:
- Vlerësimin si të ligjshëm të ndalimit të personit nën hetim M.D
- Caktimin si masë sigurimi personal ndaj personit nën hetim M.D “arrest në burg”, parashikuar nga neni 238 të K.Pr. Penale.
Çështja në apel u shqyrtua mbi bazën e ankimit të bërë nga personi nën hetim me iniciale M.D, e cila kërkoi:
– Ndryshimin e masës së sigurimit me karakter shtrëngues “arrest në burg” dhënë nga gjykata e shkallës së parë dhe caktimin e një mase sigurimi më të lehtë.
Në përfundim të gjykimit në apel, sot më datë 12.06.2023, Gjykata e Apelit të Juridiksionit të Përgjithshëm, e përbërë nga trupi gjykues me Gjyqtar Znj. Irena Brahimi, vendosi:
– Miratimin e vendimit penal nr.1127 regjistri themeltar, datë 26.05.2022 të Gjykatës së Shkallës së Parë të Juridiksionit të Përgjithshëm Tiranë.”
NJOFTIMI I GJYKATËS SË APELIT
