Lulzim Basha mblodhi pasditen e sotme, si cdo të diel, prej tre javësh, drejtuesit politikë të PD-së në qarqe. Sigurisht që në fokus ishte fushata. Gazetari i ABC, Juxhin Mustafaraj mëson detaje të reja nga takimi që u zhvillua në selinë blu.
Përpos pasqyrimit për punën e javës në terren që drejtuesit i bëjnë liderit demokrat, Lulzim Basha u kërkon edhe shqetësimet që kanë qytetarët për të ndërtuar më pas strategjinë.
Krahas drejtimit të qarkut, kryedemokrati u ka lënë detyrë të besuarve të tij që në zonat që menaxhojnë fushatën të “thithin” edhe kapacitete, individë të spikatur me qëllim propozimin për deputetë.
Kandidaturat e konfirmuara nga anëtarësia (komisioni që i përzgjodhi) do të përbëjnë jo më pak se 80% të listës së kandidatëve të Partisë Demokratike në zgjedhje, ndërkohë që jo më shumë se 20% e listës së kandidatëve do të përzgjidhen nga kryesia e PD-së.
Pikërisht te pjesa e 20%, gazetari i ABC, Juxhin Mustafaraj thotë se Lulzim Basha u ka lënë porosi drejtuesve për të tërhequr individët e spikatur, pasi lista finale ende nuk është mbyllur.
