Një alpinist i njohur si “Spider-Man” i Francës ka shënuar ditëlindjen e tij të 60-të duke u ngjitur në një rrokaqiell 48-katësh në Paris pa asnjë pajisje sigurie.
Alain Robert u ngjit në “Tour TotalEnergies” në distriktin e biznesit Défense duke mos përdorur litarë apo parzmore.
“Dua t’u dërgoj njerëzve mesazhin se të jesh 60 vjeç nuk është asgjë. Ju ende mund të bëni sport, të jeni aktiv, të bëni gjëra përrallore,” i tha ai agjencisë së lajmeve Reuters.
Pasi arriti në majën e kullës, raportohet se u arrestua.
Z. Robert është ngjitur në Tour TotalEnergies shumë herë më parë. Këtë herë, atij iu deshën vetëm 60 minuta për të arritur majën, raporton faqja e lajmeve Defence 92.
“I kam premtuar vetes disa vite më parë se kur të mbushja 60 vjeç, do të ngjitesha sërish në atë kullë, sepse 60-ta simbolizon moshën e pensionit në Francë dhe mendova se ishte një prekje e bukur”, tha ai pas ngjitjes.
Ai shtoi se qëllimi i ngjitjes ishte gjithashtu të rriste ndërgjegjësimin për ngrohjen globale.
Zoti Robert është i njohur për ngjitjen e ndërtesave të larta në mbarë botën. Arritjet e tij të guximshme përfshijnë arritjen në majën e Burj Khalifa të Dubait, ndërtesa më e lartë në botë.
Ai zakonisht i bën ngjitjet e tij pa njoftim ose leje paraprake dhe është arrestuar disa herë.
