Sasia përherë e më shumë në rritje e euros, dollarit apo paundit, shpesh nga burime të paligjshme që qarkullon në ekonominë shqiptare po nxit hapjen e pikave të reja të këmbimit valutor. Të dhënat nga Banka e Shqipërisë tregojnë se vitin e shkuar u licencuan 56 Exchange të reja duke e çuar në 583 numrin total të tyre.
“Duke pasur parasysh se për hapjen e një pike të këmbimit valutor nevojitet një kapital prej së paku 30 milionë lekësh për t’u licencuar, marrë parasysh vogëlsinë e ekonomisë shqiptare… kjo të çon se lulëzimi i tyre lidhet me kërkesën e trafikantëve të drogës për të qarkulluar paratë”, thotë gazetari Gjergj Erebara.
Nisur nga dyshimet për pastrim parash, të bazuara edhe te vlerësimet e Moneyval, Banka e Shqipërisë kreu 70 inspektime në zyrat e këmbimit valutor. Pas kontrolleve u procedua me heqjen e licencave për 29 Exchange, numri më i lartë i viteve të fundit.
“Pastrimi i parave kryhet në dy mënyra. E para garanton qarkullimin, ndërsa procesi i dytë pastrimin e parave duke kthyer paratë e paligjshme në të ligjshme”, u shpreh Erebara.
Në raportin vjetor për vitin 2022, Banka e Shqipërisë raporton se në dyshimet e pastrimit të parave janë kryer kontrolle edhe ndaj 5 bankave dhe 5 institucioneve financiare kredidhënëse.
