Ambasadorja e Shteteve të Bashkuara në Tiranë, Yuri Kim ka zhvilluar një takim me anëtarët të Këshillit të Lartë Gjyqësor, ku ka vënë theksin se Reforma në Drejtësi duhet të vazhdojë.

Kim ka treguar se KLGJ ka mbështetjen e SHBA-ve që gjyqtarët të vijojnë punën e tyre me integritet, përtej kërcënimeve apo presioneve të ndryshme.

Mesazhi i saj është i qartë, ku thotë se mënyra e vjetër e të bërit drejtësi, duhet të marrë fund, e ndërsa i bën thirrje KLGJ që të zgjedhë gjyqtarë me integritet për 3 vakancat në Gjykatën e Lartë.

“Ambasadorja Yuri Kim u takua sot me Këshillin e Lartë Gjyqësor për t’i falënderuar për bashkëpunimin e tyre gjatë tre viteve e gjysmë të fundit dhe për t’i nxitur ata që të ngulmojnë. Ajo pohoi sërish mbështetjen e fortë të SHBA për KLGJ-në dhe institucionet e tjera të drejtësisë dhe u bëri thirrje anëtarëve të KLGJ-së që të përmbushin detyrën e tyre me integritet dhe pavarësi. Ajo i kërkoi KLGJ-së të plotësojë sa më shpejt tre vendet e mbetura në Gjykatën e Lartë me gjyqtarët më të kualifikuar. Ajo theksoi gjithashtu pritshmëritë e SHBA që KLGJ të zgjedhë gjyqtarë me integritet dhe aftësi profesionale për Gjykatën e Posaçme kundër Korrupsionit dhe Krimit të Organizuar dhe gjykatat më të ulëta.

Është koha për t’u shkëputur nga mënyrat e vjetra. Reforma në drejtësi duhet të vazhdojë të zbatohet në mënyrë që Shqipëria të ecë përpara dhe zyrtarët duhet të veprojnë me integritet pavarësisht kërcënimeve dhe nxitjeve”, tha ambasadorja Kim në KLGJ.