Tabloidi i njohur britanik “The Sun” ka vënë në “peshore” Armando Brojën me sulmuesit e Chelsea në Premier League. Më saktësisht, ka nënvizuar efikasitetin e shqiptarit të huazuar te Southampton dhe atë të transferimit prej 97.5 milionë £ të bluve të Londrës, Romelu Lukaku:
“Në fakt, Broja ka qenë aq mbresëlënës sa ka shënuar më shumë se sulmi i bluve në gara të ndryshme. Sulmuesi shqiptar ka shënuar gjashtë gola në Premier League këtë sezon, çka është më shumë se të gjithë sulmuesit e Thomas Tuchel.
Kjo do të thotë se futbollisti shqiptar ka shënuar më shumë herë se 97.5 milionë stërlinat e shpenzuara për Romelu Lukaku, Hakim Ziyech, Kai Havertz, Christian Pulisic, Timo Werner dhe Callum Hudson-Odoi.
20-vjeçari kryeson gjithashtu në kategorinë e mesatares (minuta për gol), pasi shënon në çdo 205 minuta lojë, në krahasim me Werner, i cili vjen i dyti në këtë lloj renditjeje me gol për çdo 258 minuta lojë. Sulmuesi i ‘shenjtorëve’ është edhe dribluesi më i mirë i grupit sulmues në pronë të Chelsea, me 1.8 driblime të suksesshme për 90 minuta.
Megjithatë, statistikat nuk janë të gjitha të mira. Broja është i reduktuar për sa iu përket asisteve, saktësisë së pasimeve dhe goditjeve në 90 minuta nga brenda zonës së rreptësisë në krahasim me yjet e Chelsea.
Por, sërish performon po aq mirë, apo edhe më mirë se Lukaku në të gjitha kategoritë e lartpërmendura. Kjo, pasi belgu vendosi një rekord të padëshiruar së fundi, kur e preku vetëm 7 herë topin gjatë fitores së londinezëve perëndimorë ndaj Crystal Palace, të shtunën.
Kjo është një nga shumë arsyet pse menaxheri i Southampton, Ralph Hasenhuttl dëshiron të nënshkruajë me të riun shqiptar mbi baza të përhershme këtë verë. Hasenhuttl tha: “Ai e di se sa e rëndësishme është për të si lojtar të luajë vazhdimisht. Këtu merr shanset e duhura dhe ka treguar se përshtatet me lojën tonë. Ka shumë shembuj ku lojtarët, pas ndryshimit të klubit nuk performojnë siç kanë bërë me ne”.
